RECOM NAG-INSPEKSIYON SA LOOB AT PALIGID NG GRAND CENTRAL

March 20, 2012

Nagsagawa ng inspeksiyon si Caloocan City Mayor Enrico “Recom” Echiverri sa loob at paligid na nasunog na Ever Gotesco Grand Central Mall kasama ng mga kinatawan ng Department of Interior and Local Government (DILG) at Bureau of Fire Protection (BFP).

Dakong alas 12:00 kahapon ng tanghali nang pasukin ni Echiverri at ng mga kinatawan ng DILG at BFP ang loob ng nasunog na mall na matatagpuan sa kahabaan ng Rizal Avenue Extension, Caloocan City.

Ayon kay Echiveri, nagkalat ang mga bakal sa loob ng Grand Central at nakahambalang din ang iba pang gamit na siyang naging epekto ng naganap na sunog kung saan ay idineklara lamang itong fire out bandang alas 7:25 ng umaga.

Matapos namang silipin ang loob ng nasunog na mall ay inikot din ni Echiverri ang mga residenteng naninirahan sa paligid ng Grand Central kung saan ay pinaalalahanan ng alkalde ang mga ito na maging alerto sa kanilang paligid.

Hinarap din ni Echiverri ang mga stall owner na may puwesto sa loob ng mall at sinabihan na huwag piliting makapasok sa loob ng Grand Central dahil sa ngayon ay delikado pa rin ang magtagal sa loob ng nasunog na establisiyamento.

Matatandaan na noong Biyernes dakong 10:30 ng gabi nang magsimulang masunog ang Grand Central at nang rumesponde ang mga pamatay sunog ay pinigilan ang mga itong makapasok ng mga security guard ng naturang mall hanggang sa tuluyang lumaki ang apoy.

Aabot din sa labing-pitong kagawad ng BFP at fire volunteer ang nasaktan sa naganap na sunog na agad ding nalapatan ng lunas ng mga nakaantabay na rescue team ng Reformed Department of Public Safety and Traffic Management (RDPSTM).

Sinabi naman ng mga tauhan ng DILG Inter-Agency Task Force na lalabas ang resulta ng kanilang gagawing imbestigasyon sa loob ng 45 araw at dito ay mapapatunayan kung totoong may naganap na foul play sa pagkasunog ng nasabing mall.

Ayon pa sa mga ito, maaari ring managot ang mga security guard sa kanilang pagbabawal na papasukin ang mga bumbero sa nasusunog na mall sakaling mapatunayan ito na isa sa itinuturong dahilan kung bakit lumaki ang apoy.